బెల్లంకొండ-తేజ‌ టైటిల్ ఇదే

బెల్లంకొండ శ్రీ‌నివాస్ స్పీడుమీదున్నాడు. కెరీర్ ప్రారంభం నుంచి ఒక సినిమా సెట్స్‌లో వుంటే మ‌రో సినిమా జోలికి వెళ్ల‌ని ఈ గోల్డ్ స్పూన్ హీరో ఇప్పుడు ఏకంగా రెండు సినిమాల్ని లైన్‌లో పెట్టేశాడు. అందులో ఒక‌టి కొత్త ద‌ర్శ‌కుడు శ్రీ‌నివాస్ మామిళ్ల‌తో వంశ‌ధార క్రియేష‌న్స్ నిర్మిస్తున్న `క‌వ‌చం`. మ‌రొక‌టి తేజ రూపొందిస్తున్న సినిమా. ఈ రెండింటిలో శ్రీ‌నివాస్ తొలిసారి పోలీస్ ఆఫీస‌ర్‌గా న‌టించిన `క‌వ‌చం` నేడు ప్రేక్ష‌కుల ముందుకొస్తోంది. విచిత్రం ఏంటంటే ఈ రెండు చిత్రాల్లోనూ కాజ‌ల్‌ హీరోయిన్‌. త‌న‌దే కీరోల్‌.

`క‌వ‌చం` రిలీజ‌వుతున్న వేళ బెల్లంకొండ శ్రీనివాస్- తేజ‌ల తొలి క‌ల‌యిక‌లో వ‌స్తున్న సినిమాకు సంబంధించిన వార్త ఒక‌టి బ‌య‌టికి వ‌చ్చేసింది. `నేనే రాజు నేను మంత్రి` సినిమాతో మ‌ళ్లీ బౌన్స్ బ్యాక్ అయిన తేజ త‌న ల‌క్కీ మ‌స్క‌ట‌ర్‌గా భావిస్తున్న కాజ‌ల్ అగ‌ర్వాల్ నే తాజా చిత్రానికి న‌మ్ముకున్న‌ట్లు తెలుస్తోంది. అందుకే కాజ‌ల్ ప్ర‌ధానంగా సాగే క‌థ‌ని తేజ ఈ చిత్రం కోసం ఎంచుకున్న‌ట్లు కూడా వార్త‌లు వినిపిస్తున్నాయి. మ‌న్నారా చోప్రా మ‌రో నాయిక‌గా న‌టిస్తున్న ఈ చిత్రాన్ని అనిల్ సుంక‌ర నిర్మిస్తున్నాడు. క‌థానాయిక చుట్టూ తిరిగే క‌థ కావ‌డంతో ఈ చిత్రానికి ద‌ర్శ‌కుడు తేజ `సీత‌` అనే టైటిల్‌ను ఫిక్స్ చేసిన‌ట్లు స‌మాచారం. ఇప్ప‌టి వ‌ర‌కు త‌న చుట్టూ తిరిగే క‌థ‌ల్లో న‌టిస్తూ వ‌స్తున్న బెల్లంకొండ శ్రీ‌నివాస్‌కు ఈ సినిమాతో తేజ కొత్త బాట‌ను వేస్తున్న‌ట్లు క‌నిపిస్తోంద‌ని చెబుతున్నారు. `ఎన్టీఆర్‌` బ‌యోపిక్ నుంచి త‌ప్పుకున్న తేజ ఈ చిత్రాన్ని సైలెంట్‌గా మొద‌లుపెట్టి చ‌క‌చ‌కా ప‌రుగులెట్టిస్తున్నాడు. ఇప్ప‌టికే 80 శాతం షూటింగ్ పూర్తి చేయ‌డం ఆశ్చ‌ర్యాన్ని క‌లిగిస్తుండ‌గా డిసెంబ‌ర్‌లో మిగ‌తా బ్యాలెన్స్ షూటింగ్‌ను పూర్తి చేసి జ‌న‌వ‌రితో పోస్ట్ ప్రొడ‌క్ష‌న్ కార్య‌క్ర‌మాల్ని ముగించి చిత్రాన్ని ఫిబ్ర‌వ‌రికి ప్రేక్ష‌కుల ముందుకు తీసుకురాబోతున్నాడు.