28న మెగా గాళ్ పెళ్లి

స్టార్ హీరోల కుమార్తెలు క‌థానాయిక‌లు అవ్వ‌డం అన్న‌ది రేర్ సిట్యుయేష‌న్‌. ఇది బాలీవుడ్‌లో ఓకే కానీ, టాలీవుడ్‌లో నాట్ ఓకే. కానీ ప్ర‌స్తుత స‌న్నివేశంలో పూర్తి మార్పు క‌నిపిస్తోంది. తొలిగా మెగా కాంపౌండ్ లో ఈ విప్ల‌వం మొద‌లైంది. మెగా బ్ర‌ద‌ర్ నాగ‌బాబు త‌న కుమార్తె నీహారిక‌ను ఆశీర్వ‌దించి ఈ రంగంలో ప్రోత్స‌హిస్తున్నారు. నీహారిక పెద్ద స్టార్ కావాల‌ని పెద‌నాన్న మెగాస్టార్ చిరంజీవి ఇదివ‌ర‌కూ ఆశీర్వ‌దించారు. మెగా కాంపౌండ్ హీరోల నుంచి నీహారిక‌కు కావాల్సిన పూర్తి స‌పోర్ట్ ఉంది. ఆ క్ర‌మంలోనే వెబ్ సిరీస్‌లు, సినిమాలు అంటూ నీహా ఇప్ప‌టికే చాలా అనుభ‌వ‌మే ఘ‌డించింది.

నీహారిక న‌టించిన రెండో సినిమా `హ్యాపీ వెడ్డింగ్` ఈనెల 28న‌ రిలీజ్‌కి రెడీ అవుతోంది. ఈ సినిమాని యు.వి.క్రియేష‌న్స్& పాకెట్ సినిమా ప‌తాకంపై ల‌క్ష్మ‌ణ్ కార్య ద‌ర్శ‌క‌త్వంలో తెర‌కెక్కించారు. ఇదే చిత్రంలో సుమంత్ అశ్విన్ క‌థానాయ‌కుడిగా న‌టించారు. నీహారిక‌తో పాటు సుమంత్ అశ్విన్‌కి ఈ సినిమా బ్రేక్‌నివ్వాల్సిన స‌న్నివేశం ఉంది.